前巴塞隆拿球員希比日前爆料，指2008年球隊賣走「細哨」朗拿甸奴及迪高，全因為想保護美斯嘅成長，因為二人經常飲酒之後參加訓練。

希比直言，巴塞擔心細哨及迪高醉酒參加訓練會帶壞美斯，所以巴塞忍痛決定將兩位名將賣掉，從而令美斯可以專心喺巴塞成長。

作為巴塞青訓歷史上最天才嘅球員，巴塞16歲就已經認定美斯嘅天賦，所以球隊決定不惜一切都要保護及培養佢，即使要將球王級嘅細哨賣走亦都在所不計。

而細哨與美斯實際上卻係亦師亦友嘅關係，細哨喺效力巴塞期間非常痛錫美斯，而美斯亦都一直跟隨細哨嘅腳步，最終慢慢成為如今嘅超級巨星。

另外，希比亦透露原來自己根本唔想加盟巴塞，當日佢想加盟嘅係拜仁慕尼黑或留喺阿仙奴，但因為哥迪奧拿不斷打電話比佢嘅經理人，所以經理人決定將佢帶到魯營球場。而被迫到巴塞踢波嘅希比，最後被外借多過留喺巴塞踢，而雙方喺2012年亦同意終止合同。