之前網上有一系列「爆肌動物」嘅相Hit爆，有趣在呢啲動物唔係真係咁大隻，只不過係錯覺而影響大家觀感，睇落柴犬可以揮出右勾拳，狐狸又擁有粗壯手臂等等，非常搞笑！

而早前日本模型師めーちっさい都將右勾拳柴犬實體化過，好多網友見到後都表示想要返隻，希望可以將咁搞笑嘅模型量產化。

要模型師量產Figure就難啲，不過大家想擁有「爆肌動物」模型嘅夢想又唔係真係咁遙遠，因為擅長製作話題扭蛋、抱枕、生活雜貨嘅SK JAPAN公司已經將呢啲可愛嘅網上搞笑圖片通通實體化，整成一系列「爆肌動物」扭蛋！

SK JAPAN公司除咗將網上知名嘅爆肌動物實體化外，亦自行設計出肌肉鯊魚，預計呢系列扭蛋將於2019年10月下旬發售，5隻一套，扭一次要300日元，真係好想快啲推出扭返隻呀！