雖然精工已經唔係第一次同《海賊王》crossover，不過每次都有新驚喜！適逢《海賊王》動畫播放20週年，精工就聯乘《海賊王》推出「《海賊王》動畫20週年紀念錶」，而且今次設計仲相當有深度，一齊睇下先！

呢款「《海賊王》動畫20週年紀念錶」錶面上每一個數字，都代表住「草帽海賊團」加入嘅順序，睇時間嘅同時仲可以懷緬一下「草帽海賊團」嘅歷史；除咗數字上嘅特別設計之外，手錶嘅秒針亦用上路飛嘅剪影，低調得嚟又不失主題精髓。

而錶背則印上20週年特別設計嘅logo，另外仲有限定嘅數字編碼。

目前全球限量5000隻「《海賊王》動畫20週年紀念錶」，售價約44800日元，預計9月下旬出貨，想買嘅巴打快啲預訂喇！