1996年，任天堂推出Nintendo 64(N64)家用遊戲機，引黎一陣熱潮，當中不乏非常經典嘅遊戲，好似《超級瑪利奧64》及《薩爾達傳說 時之笛》等等。而相隔一年後，Nike推出Air Max 97鞋款，其鞋身表面嘅流線型設計黎到今日亦非常受歡迎。如果將上述兩者Crossover，唔知結果出黎會點呢？

今次Nike就將N64融入Air Max 97，可以睇到鞋身以N64機身主色灰色為主，其餘配色則為紅、藍、綠、黃，對N64有認識嘅朋友相信一睇就知係呢4隻色係黎自N64手制上按鈕嘅顏色。唔單止咁，如果你有細心留意嘅話，就可以睇到鞋身上仲有一啲細小嘅三角型圖案，原來係黎自N64手制上嘅十字制的。

另外，鞋舌上左右腳分別印上Power及Reset兩個大字，相信一睇就知係黎自N64機身上嘅兩個主要按鈕。

對於N64或Air Max 97情有獨鍾嘅朋友，相信呢對Crossover鞋款將非常值得收藏。目前發售日期雖然未有具體日子，但預計將會近日內公布，而售價則已定為160美元。