早喺幾年前，B廠推出過1/144 嘅木馬號格納庫，當時嘅產品，就好似平時嘅模型咁，啤完入袋就畀你砌，而且係全部都係清一色灰色，質感當然好膠(本來就係膠)。當然想靚嘅，就要自己動手上色，搵返啲相關水貼貼下，咁就真實感大增。今次2019 Renewal Edition 簡直係為懶人而設，預先上色，附送埋水貼，唔駛多手工就可以唔錯嘅真實感，相當適合有飾櫃嘅朋友放置模型。

簡單嘅組裝，貼上水貼己經非常靚，要唔太高嘅話，已經好收貨，放喺飾櫃/廚窗，再放啲新機展示，已經夠注目。如果實物塗裝有哩啲圖片咁有陰影MAX效果，絕對係Prodcut 產品相當高CP嘅產品。

同舊版一樣，都可以變成一米咁長，出擊模式準備。可以變型就多一個玩法，拆開兩用，做兩個簡單場景又得，變複單位又得。

MS本體當然唔包括在內啦！木馬號格納庫另一個好玩嘅地方係，配合埋其它1/144 配件，HD 人仔，武器包送嘅掛架，豐富成個場景(以上都係廢話，鬼唔知阿媽係女人)，總之玩法唔只單一種局限啦！

配置方面同舊版一樣，都係有齊格納庫，發射台，通道，個爪全部都有，另外再附送水貼。而售價梗係有所增加啦！當係買上色人工又好，通貨彭脹又好，咩都好啦！舊產品都要10,400円，差果少少，懶人就係想用錢去解決問題，所以哩個版本都好適合小熊入手。

Realistic Model Series 1/144 木馬號格納庫 Renewal edition

推出日期：2019年10月預定
售價：12,800円(未連稅)
Size：500mm(L) x 200mm(H) x ~180-200mm(W) (組裝後最長可達1米)
質材：PS / ABS
產地：中國