一年一度嘅香港動漫電玩節 2019 (動漫節)於今日正式展開，焦點除咗有唔同遊戲試玩外，一定係場內大大小小嘅 Figure 公仔！今年上畫嘅電影《End Game》帶起咗 Marvel 超級英雄熱潮，其中場內戴住無限寶石手套嘅 Iron Man 及 Thanos 絕對係必去打卡位。另外仲有一張門票可以同時去嘅電競音樂節，場內仲有懷舊格鬥街機試玩區。

一如往年，Hot Toys 繼去年《Infinity War》熱潮後，今年繼續乘住 Marvel 電影《End Games》推出一系列 Figure，其中 1:6 Iron Man Mark LXXXV (戰損版)及 1:4《蜘蛛俠: 強勢回歸》蜘蛛俠早已成為必搶 Item。

不過買唔到都唔緊要，因為 Hot Toys 攤位同時展出咗多個 1:1 Marvel 超級英雄，包括 Thanos、Iron Man、Captain America、Spider-man 等，以及多個 Marvel、DC、Star Wars 等 Figure，淨係齋睇都值回票價。

今年 PlayStation 繼續成為動漫展主要參展商，基本上一入會場門口就可以見到多部 PS4 主機試玩區，其中有受到注目嘅人氣經典作品《FINAL FANTASY VII REMAKE》。

今次 PlayStation 喺展區設置咗超過40部 PS4 及 PS VR 遊戲試玩台，奧運遊戲《Olympic Games Tokyo 2020 The Official Video Game》、《Monster Hunter World：Iceborne》、《DRAGON BALL Z：KAKAROT》等。

此外，動漫節其中一個焦點係由香港「漫畫教父」黃玉郎創作嘅武打漫畫《龍虎門》踏入50週年，負責出版玉皇朝喺攤位內展出多個本地漫畫家嘅賀圖，包括著名漫畫家馬榮成。而場內仲有多個《龍虎門》經典紀念產品，仲漫畫精彩封及 Figure 展出。

今年除咗會展1樓有動漫節外，3樓都有電競音樂節舉辦，動漫節入場人士可以以一張門票通行兩個展區。電競音樂節今年繼續有電競賽事、主題表演，另外仲設有懷舊格鬥街機試玩區，大家可以喺場內玩到原裝《街霸》﹑《拳皇》街機。