Marvel第四階段MCU作品中，有一部總是感覺格格不入的華人英雄作品《上氣（Shang-Chi）》，將會於2021年推出上映，暫時資料不多只公佈左主角上氣由劉思慕飾演，而最觸目的奸角則由梁朝偉飾演，不過呢套原本想打亞洲市場的作品，就好明顯受到中國內地一片叫罵指其有「辱華」成份。於是乎創作上氣漫畫的原創人之一就出來解畫，指電影中好可能會抽走或改變傅滿州呢個人物，相信劇情會因應大改，梁朝偉角色名同形象好可能都會被改頭換面，變成好多十億人都認同的新「陽光」奸角，起碼就係不懼玻璃心，可能壞蛋中有愛國情懷，係英雄豪傑！

漫威工作室（Marvel Studios）推出電影《上氣》但如果被世界最大市場杯葛，肯定計唔掂數，也不符合大愛反種族歧視的荷里活政治正確理念，所以漫畫原創人之一的 Jim Starlin 表明，不想在電影中見到傅滿州，「我希望，也相信肯定 Marvel 將會改變這個人物」。如根據原作傅滿州角色著清裝疆屍咁的形象就算唔考慮辱唔辱華都唔太現代，所以Jim Starlin指出傅滿州相關的書充滿「黃禍」概念，放大白人至上的主義，實際上連作者都唔敢直認呢種理念，重申「無論如何這都是政治不正確之事」。

所以，可以肯定《上氣（Shang-Chi）》一片將會改動原作「滿大人」的角色，讓其雖則依然係一個恐怖分子奸角，但就唔會涉及種族內容。總之等影帝梁朝偉演得有「尊嚴」，壞得中國人拍手叫好！其實做返個現實的強國有錢人就已經好夠做，中國人開心，全世界都知呢個咩野角色，其實只要梁朝偉新奸角買起左Stark Tower，接住落去做返強國人做的事，然後生個仔上氣唔聽話，長大後發覺原來呢個老豆財雄勢大無惡不常，於是時代革命大義滅親，上氣都依然會係一套有趣的作品！

比返個原作但又無咩參考價值的指標比大家睇下，上氣（Shang-chi）這角色最早出現係1973年的MARVEL漫畫《Special Marvel Edition》入面，人物改編自美國電視劇集《功夫》（Kung Fu），乘著功夫巨星李小龍的聲威，上氣造型實際上是參考李小龍做藍本，當年功夫熱潮大盛，故上氣也曾大受歡迎！

原作漫畫中，上氣是一位中美混血兒，原藉中國河南省，母親是美國白人，而父親則是梁朝偉飾演的傅滿州，自幼就被訓練成一個殺人的機器最強戰士，不過上氣卻一直唔知道父親的惡行；後來上氣長大加入了英國的軍情六處(我唔太知中美混血兒點解變左英國軍隊！)，在一次任務中終於傻傻發現父親原來是個大魔頭，最後當然是大義滅親將滿大人擊敗。但呢個原作設定又確實是異常無腦，所以Marvel配合時代改進劇情相信都會是必須的事。估計上氣最後應會加入復仇者聯盟，成為MCU中的一員。就等住睇下個故事劇本會點樣改變，改到唔怕強國玻璃心又讓其他國家的影迷信服！