2019年已經黎到10月中，職業網球賽呢一個年度亦都好快迎來完結，現年已經38歲嘅「瑞士天王」費達拿，亦都開始計劃來年嘅比賽，至少確認佢仲未有掛拍嘅想法。

對於費達拿黎講，2019年表現並唔算理想，因為佢未能再奪四大滿貫冠軍，並且僅有溫布頓網球賽成功打入決賽。未有大滿貫錦標落袋，可能大家又會再泛起費達拿係咪要退役嘅想法，但費天王卻明確表示來年佢將會代表瑞士參加東京奧運會。

而除左奧運會之外，費達拿更揚言希望參加法網，要知道法網呢塊紅土場係「泥地王」拿度嘅天堂，所以唔少人都覺得費達拿應該唔會真係參加法網的。

不過費達拿卻好肯定咁表示，自己真係計劃參加2020年嘅法網，而明年整個年度佢會盡量減少比賽，會參加嘅賽事可能只會有法網、奧運會、哈雷網球賽、溫布頓網球賽、辛辛那提及美國公開賽。

按費達拿所講既，佢好大機會會放棄大滿貫之一嘅澳網，其實將焦點放喺另外三大滿貫及奧運會，要知道「費天王」嘅生涯之一就係要奪得奧運男單金牌，另外就係希望可以再增加大滿貫錦標數目，因為排名第二嘅拿度已經追至只落後費達拿一個大滿貫冠軍。