如果你問我2020有咩必睇電影推薦， 踏入1月份絕對絕對絕對唔能夠錯過《1917：逆戰救兵》，個人保證係滿分之作。有人話係 《雷霆救兵》後最佳戰爭片，我就覺得唔同睇法，1917係電影史一個全新進化方式去呈現沉浸式電影新睇法， 全片以一鏡到底拍攝，實時演繹戰場上的分秒，真正以小人物為本從一個「人」的角度探索感受戰爭的故事，如果你睇厭左「國家」為本保家衛國作為中心思想嘅戰爭片, 一齊經歷一次世界大戰1917絕對震撼心靈。 最近1917喺網上發佈咗一個12分鐘長嘅電影製作特輯，作為愛電影嘅你呢12分鐘精華無可能唔睇。

【極力推薦12分鐘長篇製作特輯】

史詩式鉅獻《1917：逆戰救兵》由金像導演森曼達斯（Sam Mendes）執導，獲得嘅電影獎項提名多不勝數，相信即將係各大獎項嘅熱門，早前已榮獲本屆金球獎3項提名，包括：「最佳電影（劇情組）」」、「最佳導演」及「最佳原創音樂」，令這部電影從各大小獎項所獲得的提名總數增加至接近40項，堪稱成績斐然！ 從各項提名其實就可以睇到呢套電影可取之處， 首先拍攝出色，一鏡到底形式震撼新穎獨特，雖然大家都可能睇過《屍殺片場》，但係以此方式以現今最大規模最專業嘅電影團隊做出嚟嘅真人真事第一次世界大戰故事，呢種震撼感覺係大銀幕第一次。 此外正如提名， 最佳原創音樂可以睇到呢套電影擁有非常出色嘅配樂，電影無《星夢情深》唱得出的流行，無Into the unknown 街知巷聞式熱門歌曲，但 1917帶嚟嘅配樂非常成功將觀眾帶入一次沉浸式一次世界大戰體驗， 以電影相輔相承功能來講，這是最佳配樂無疑！

預告

《新鐵金剛：智破天凶城》（Skyfall）金像導演森曼達斯表示拍完前一部「占士邦」電影後想作一些新嘗試，《1917：逆戰救兵》的故事來自他曾參與第一次世界大戰的祖父。他和金像獎「最佳攝影」傳奇攝影師羅傑狄金斯（Roger Deakins）決定以「一鏡到底」的方式拍攝(好想問佢係咪睇左《屍殺列車》)，希望可以讓觀眾一齊與主角踏上征途。因為呢種拍攝手法，鏡頭內的一切，無論係攝影機、攝影師，甚至拍攝日天氣情況，都要同演員的演出同步，可以講戲裡戲外同樣爭分奪秒。為左順利拍攝，整個劇組的綵排時間更長達半年。至於拍攝嘅花絮相信大家喺12分鐘嘅短片裏面都已經睇到我就唔需要介紹多講。

演員方面主角由《神奇虎爸》（Captain Fantastic）佐治麥基（George MacKay）及《權力遊戲》（Game of Thrones）甸查理斯查普曼（Dean-Charles Chapman）兩位新生代演員負責帶畀觀眾一氣呵成嘅震撼體驗，連帶的還有一大班巨星助陣客串，包括《皇上無話兒》（The King's Speech）金像影帝哥連費夫（Colin Firth）；《奇異博士》（Doctor Strange）金像提名影帝班尼狄甘巴貝治（Benedict Cumberbatch）；人氣電視劇《內政保鑣》（Bodyguard）金球視帝理察麥登（Richard Madden）；《皇家特工》（Kingsman）系列實力男星馬克斯特朗（Mark Strong）；《新世紀福爾摩斯》（Sherlock）型格男星安德魯史葛（Andrew Scott）等力撐，聲勢陣容可謂盛極一時。不過我認為無論咩嘢人去演都唔係最重要， 重要嘅係呢一種沉浸式一氣呵成新體驗，感覺一流，有必要去最好嘅電影院最強勁嘅音響系統感受最好體驗。

故事劇情，簡單但有趣，一戰打得如火如荼之際，英軍正跌入德軍設下的陷阱……為了扭轉戰局，兩名英國小兵史高菲（佐治麥基  飾）及布雷克（甸查理斯查普曼 飾）臨危受命，必須在一日之內越過敵陣，向前線的同袍傳令煞停進攻。若任務失敗，英軍將墮入敵軍佈下的天羅地網，1,600人將因此陣亡，包括兩位普通軍人為了拯救戰友，二人必須馬上起行孤軍突破炮火，爭分奪秒完成這個九死一生的任務，傳令停止最前線送頭進攻。

《1917：逆戰救兵》2020年1月9日先上映，不過提醒大家元旦1月1日就有優先場，搶飛要快絕對值得。本來好想寫個影評但我發覺我一味讚樣樣都話很好很好咁不如直接推薦大家入場睇。