講起香港本土文化唔知你會諗起乜，但係呢種文化特別受香港人重視，而陪伴香港人長大嘅電車及本地漫畫絕對算得上係當中嘅表表者。

可能現時唔少朋友都鍾意睇日漫，但其實香港本地漫畫亦有唔少支持者，一眾角色好似「老夫子」、「陳浩南」、「步驚雲」、「癲噹」、「聾貓」等等都一定係港人耳熟能詳嘅名字。而黎緊明年1月各位市民將有機會於乘搭電車嘅時候見到呢班漫畫人物。

由香港設計中心主辦及香港動漫畫聯會任策略伙伴舉行嘅「#dd 推介 – 漫漫遊」，將會把超過30個漫畫角色帶入兩部遊走港島區嘅電車以及兩個位於灣仔區嘅電車站，其中兩部漫畫電車將更有「老夫子」及「哨牙珍」嘅 1:1 3D模型設於電車上，令佢地可以陪住市民一齊坐電車感受香港獨有文化。

當然當你坐電車遇見呢班漫畫人物嘅時候，又點可以放過同佢地打卡嘅機會，同時向朋友們宣傳一下香港本土文化就真係一舉兩得啦！