大家或者記得，上兩個星期我哋先介紹過，由《Twilight》男星Robert Pattinson主演嘅新《Batman》「流出」咗一段所謂造型片(實情係導演Matt Reeves發佈)，不過講真條片又紅又暗又淨係睇到心口對上，其實就冇咩討論空間。「好彩」嘅係最新又有流出相同片啦，仲係光天化日之下，睇哂新蝙蝠裝同蝙蝠電單車嘅全相添！

據《Variety》報導，呢幾張相再加12秒嘅片係由PA Wire嘅攝影師，於蘇格蘭格拉斯哥大墓地「未經授權下」拍攝，當時《Batman》正喺到拍緊外景，照片中可以清晰見到動作演員穿上蝙蝠裝、騎住蝙蝠電單車，大家亦可以更清楚地睇到新蝙蝠裝嘅設計非常簡單，而且風格極為真實，《Variety》更形容為「比Dark Knight更真實」。至於架電單車除咗個車頭有對蝙蝠耳，其實同一架普通電單車分別不大。

又值得一提嘅係，喺全長12秒嘅片段中，揸住另一部電單車嘅動作演員，應該係扮演緊Cat Woman(由Zoë Kravitz飾演)，而佢呢身造型可以話係完全冇「Cat」嘅成份，似乎進一步證實新《Batman》會走極度真實風。

講開又講，早排出造型片，依家又有流出，究竟係劇組咁唔小心(或者唔Care)令造型提早見光，定係電影公司想借呢幾張相試下水溫呢？之於你問啲網民有咩意見？個個都喺到笑緊條片最後個動作演員炒車囉。