《Game of Thrones》系列令「龍母」Emilia Clarke成位全球巨星，而佢亦利用自己嘅名氣正面影響社會。曾經兩次經歷腦部動脈瘤嘅佢成立「SameYou」救濟金，本為幫助同樣曾受腦部創傷嘅患者，但依家就決定「曲線」幫埋武漢肺炎患者，大家仲有可能獲得同佢「共進晚餐」嘅機會！

Emilia早前喺IG上呼籲大家捐款至佢嘅「SameYou救濟金」，目標係於4月9日前籌到25萬英鎊，幫助一啲目前住喺醫院中嘅腦創傷病人，能夠於武漢肺炎疫情期間搬到康復機構中暫住，目的唔係為咗避難，而係空出醫院床位，以便醫院接收更多武漢肺炎急病患者，甚有「曲線救國」嘅味道。

而「龍母」亦知道單單道德感召唔足以令大家打開個荷包，所以亦宣佈會於捐款者之中隨機抽出12個人，一齊進行視像會議式嘅「虛擬晚餐」，你可以同龍母隔住個Mon一齊住嘢食(但龍母話佢係唔識整嘢食)、一齊傾計講下笑咁。

雖然唔係真正面對面，但可以同Emilia 視像晚餐嘅機會都夠講好幾年呀？唯一希望就係佢唔好用Zoom囉…