{ SKIP }
文:MenClub 魏文青  
POSTED ON 27 May 2020

眼見近排武漢肺炎確診人數下跌,日本又全面解除緊急狀態,相信唔少人都已經期待緊去日本旅行嘅日子 (當然,前題係你仲出到境,而人家又認你個免簽),咁去得日本少不免都可能會去下迪士尼樂園呀、環球影城之類嘅主題樂園玩下,但根據日本相關協會提出嘅最新指引,有啲你覺得好理所當然嘅嘢可能冇得做,例如坐過山車嗰陣大叫!

自2月開始,包括東京迪士尼及大阪環球影城嘅日本各大小主題樂園都因為避免人群聚集而停業,冇做幾個月生意依家當然密鑼緊鼓準備重開。而東日本及西日本遊園地協會亦公佈重開指引,防止疫情再次爆發,當中大部份都係啲好合理嘅提議,包括限制入場人數、為入數人士量度體溫、園內必須戴口罩、保持社交距離、室內地點儘量開窗保持通風之類。

但其中有一條針對遊玩設施嘅指引就相當令人R頭,因為佢要求園方敦促遊玩人士不要大叫、尖叫,而所謂「遊玩設施」就係包含所有室內室外機動設施、鬼屋、甚至園內嘅表演及巡遊。縱然唔難理解指引係想減少大家噴出飛沫嘅機會,但你要班人去玩啲本身設計出黎就係令人尖叫嘅設施時唔可以尖叫,好似又有啲強人所難喎。

值得留意嘅係,東日本及西日本遊園地協會不僅與Oriental Land Group (東京迪士尼嘅管理公司) 及USJ 有合作協議,唔少景點及渡假地方都屬於協會旗下,例如今次呢份指引就係由「長島溫泉」放上自己網站後被發現…咁即係浸溫泉都要戴口罩?唔著衫但戴口罩咪…咪成個汁男咁樣?

即係唔需要加減配件就可以變出Circuit Mode、Aero Mode、以及打開升壓渦嘅Boost On模式。
hobby
【高智能方程式】河森正治監修 全變形超級雷神AKF-11
02 Jul 2020
因為唔達標,嗰萬令Yen都會退返畀參加者,即係Street Kart係斗零都收唔到。
hobby
【日本】秋葉原卡丁車眾籌 兩個月籌800蚊
02 Jul 2020