平時有留意日本動漫新聞嘅讀者，應該會記得上年7月發生嘅「京都動畫 (俗稱京名尼) 第一工作室縱火事件」，最後導致36人死亡、35人受傷，大量珍貴文件、原畫受損，乃日本動畫界重大損失。事隔近乎一年，有日本網民就發現另一大型動畫製作公司「BONES (俗稱骨頭社)」更改咗網站嘅免責聲明，相信為「京阿尼大火」後的影響。 

卻說骨頭社官方網站「招聘」頁面，本來有接受任何人提交動畫靈感及企劃書，但最新版本就多咗段免責聲明，講到唔會接受任何有關作品、人物、名字，甚至營銷、公關策略嘅提案，而原因就係「避免本社原創作品與投稿作品出現意外重疊或相似而引起的紛爭」簡單啲黎講就係避免被人話佢「抄」人哋提交嘅內容，所以就乾脆叫人唔好交。

「骨頭社」新免責聲明 (Bones.co.jp)

點解又話同京阿尼大火有關呢？卻說當日，有精神病病史嘅犯人青葉真司縱火後被制服，警察到場問佢點解要咁做時，佢回答「他們(京阿尼)盜用我的小說，所以放火」，亦有目擊者聽到青葉真司事發時大叫「抄襲」，雖然未知實際上佢指嘅係咩事 (疑犯因為燒傷，被捕後住院又遇上武肺，日本警方5月尾才正式拘捕犯人)，但或者就係令骨頭社停收外界提案主要原因。

截圖自Bones.co.jp

骨頭社為日本動畫界知名大廠，曾製作過2003年版《鋼鍊》、2009年《鋼鍊FA》、《我的英雄學院》、《文豪野犬》、《路人超能100》等知名動畫。