香港話就話交通方便，但相信大家都有試過要去啲唔近地鐵站，又或者啱啱就喺兩個地鐵站之間唔上唔落嘅地方，結果都係要自己行。以依家呢個天氣，再加上戴住口罩，都真係幾辛苦。外國有所謂「Last Mile Vehicle」專門用黎解決最後嘅呢程路，實際上啲咩風火輪、電動滑板車都係屬於呢個行列，而如果你嫌呢啲都唔夠方便，咁日本製嘅Walkcar就應該啱哂你！

Walkcar個樣睇落非常似一部有轆嘅Notebook，實際面板大小(21.5cm X 34.6cm) 亦真係同部13吋Notebook差唔多，而且連埋轆厚到都只係有7.4cm、加上使用碳纖同杜拉鋁 (Duralumin)，淨重2.9kg，與目前市面上有嘅同類產品相比佢可以話係輕若鴻毛，極易攜帶收藏。

動力方面用上花費5年時間研發嘅自家摩打，最高速可達16km/h (sports mode)，更可以上10度嘅斜坡。航程方面為5km (sports mode)，叉一次電都只係一個鐘。加上使用重心控制速度方向，雙腳離開即停等功能，睇落非常適合返工放工使用。

講到佢咁好，佢有冇缺點呢？當然有啦！首先最明顯嘅缺點就係貴！售價198,000Yen，即係超過HK$14,000，買架真車都可能得；第二就係佢有負重限制，最高只限80kg，相信唔少高大嘅Gentlemen應該都超過呢個數字。不過如果你冇超重又願意花呢個錢，就去Cocoa Motors官網睇下啦。