《The Last of Us Part II》出咗個幾禮拜，相信要玩嘅大家都玩哂，要鬧嘅大家都鬧到口臭，但同時網上亦開始出現為劇情辯護嘅文章，甚至連一度低至3.3分嘅Metacritics評分都慢慢「回升」到4.9，似乎大家對遊戲劇情係好係壞都仲未有共識。但大家對於遊戲嘅另一方面就好有共識，就係入面嘅場景有幾靚幾像真！

就算係Metacritics上嘅0分評價，好多人鬧完一輪都會加返句「不過遊戲畫面係幾靚嘅」，實在又係有幾靚？由於遊戲入面個西雅圖有不少場景、建築物都係參照現真中嘅西雅圖建造，所以有外國Youtuber就特登去對照現實及遊戲中嘅西雅圖，睇下Naughty Dog對西雅圖嘅還原度有幾高。

從呢段片能夠睇到，雖然唔能夠話係100%照Copy，部份場景甚至放埋一齊睇唔出係同一個地方，但依然可以睇得出Naughty Dog花咗唔少時間研究西雅圖嘅市貌，喺呢方面依然係值得一讚。尤其唔少住喺西雅圖嘅網民留言，透過遊戲絕對能夠感受到末日後嘅西雅圖會係點嘅樣。但亦有人指玩完隻Game會好討厭西雅圖呢個地方…原因，你懂的。