作為追求格式規格音質至上的人，我當然唔認為Spotify好聲，但講到最方便最多人用可能都仲係Spotify，Spotify用家有喜訊，佢地又再一次可以有「即時歌詞功能」，聽歌又可以有歌詞跟住睇，聽中文歌可以跟唱聽外文歌可當學外語，非常實用，我唔明2016年點解要取消合作，反正而家有返睇歌詞功能免費用家都用到就係喜訊！

Spotify再一次同Musixmatch合作，推出聽歌的「即時歌詞功能」，今日開始，香港的用家又可以享用呢項實用功能。用家只需要係歌曲播放介面選擇啟用，就可以係歌曲播放過程同時顯示即時歌詞。而即時歌詞內容，由Musixmatch公司合作提供。

其實呢個並非新功能，原本就一直有，不過Spotify同Musixmatch合作即時歌詞功能曾經係2016年6月宣布結束合作。今次其實是重新又合作將相關功能回歸！目的當然就係為咗對抗Apple music等等已經一早提供即時歌詞功能嘅串流音樂服務平台， 藉此增強功能吸引更多人使用。

講下數據，目前Spotify音樂串流服務，全球使用人數已經累積達3億人以上，並且佔據串流音樂服務市場約35％佔有率，Spotify一直係主流音樂同獨立創作等本地音樂方面都有良好合作關系，所以唔同地區市場都有一定的本地創作，而佢地都有搞Podcast內容吸引更多用家。方便界面始終都係吸引人最重要元素。