由Tony Jaa、《Resident Evil》真人版電影女星Mila Jovovich主演嘅《Monster Hunter》真人版電影，日前放出咗一條「Black Diablo (黑角龍) Official Teaser」嘅預告，當中竟然見到Mila Jovovich拎住碌加特林機槍，堪稱係《芒亨》Fans惡夢成真。但其實大家又唔使驚喎。

呢段只係長十幾秒嘅預告中，可以見到身穿現代軍人服、拎住現代軍備嘅Artemis (Mila Jovovich飾) 及其隊友處身於一個沙漠之上，而一隻龐然大物就喺沙入面向佢哋衝過去，原來係登埸動作同聲效同Game入面幾乎一模一樣嘅黑角龍，於是Artemis就對黑角龍開槍但冇用，黑角龍仲一手揈開咗成架車，條預告就完啦！

雖然係出現現代軍備，但大家都唔使擔心套戲會被人改到「用槍打芒亨」，事關真人版《Monster Hunter》電影嘅劇情簡介，一開始就講到明Artemis同隊友係「穿越」去到《芒亨》嘅世界，而當佢哋發現現代軍備對《芒亨》世界怪物無效，就會向Tony Jaa飾演嘅老手獵人學習狩獵技巧，根據之前嘅報導，Artemis仲會係用雙刀嘅添！

所以，呢條預告公開嘅，相信就係Artemis一眾穿越後，與《芒亨》世界怪物嘅首次相遇，仲用緊槍係一件好合理嘅事……掛？電影預計於今年12月上映，唔知Sony對呢部戲好有信心，覺得啲人會為咗佢於疫情下入場，定Sony根本唔Care有冇人入埸呢？