Netflix上嘅香港區十大熱門作品，好多時都係由各種韓劇包辦，而又好老實講大部份男仔都唔睇韓劇，唯一會睇嘅，大概就係冇咩情情塔塔嘅《屍戰朝鮮》啦！而Netflix最新宣佈《屍》將會開拍第三季，而且上季尾驚喜出現10秒嘅韓國女神全智賢正式確認出演。

圖片：Netflix

新一季嘅全名為《屍戰朝鮮：雅信傳》，目前未知「雅信」究竟係邊個，但睇新聞稿嘅措詞，第三季將會以全智賢飾演嘅「神秘角色 (雅信？)」為主角，探討佢嘅真實身份、背景故事以及生死草與喪屍嘅「終極秘密」。

值得一提，相信係因為劇情角度改變，頭兩季嘅兩大主角朱智勛及裴斗娜似乎都唔會出現於第三季中，唯一回歸嘅幕前舊人為第二季中、由朴秉恩飾演嘅「御營大將」。相信佢與全智賢嘅角色有一定關係。幕後方面，首兩季導演金成勳及著名編劇金銀姬亦會回歸。

朴秉恩飾演嘅「御營大將」

圖片：Netflix