一直以嚟暴力遊戲都比人鬧「教壞細路」，尤其隨著遊戲主機不斷進化，遊戲畫質愈做愈迫真，社會上出現唔少聲音將青少年犯罪行為歸咎於暴力遊戲。最近美國就有份為期長達10年嘅研究報告出版，證明暴力行為同玩暴力遊戲並無關係。

講到暴力遊戲之首非《GTA》莫屬，內容血腥暴力，玩家所扮演嘅角色無惡不作，隨意打劫偷車，大街大巷開槍殺人，唔少國家將佢視為「18禁」遊戲，更有國家直情禁止進口發售。

（圖片截至：liebertpub.com）

今次研究報告正正就以《GTA》為研究材料，報告主題名為「GTA與成長：從青少年時候玩暴力遊戲的10年縱向研究（Growing Up with Grand Theft Auto: A 10-Year Study of Longitudinal Growth of Violent Video Game Play in Adolescents）」。研究小組對居住美國西北部大城市參加者（65%白人、12%黑人、19%多民族裔、4%其他民族），進行長達10年追蹤研究，檢視玩《GTA》對佢吔成長有咩影響，最終研究結果表明玩暴力遊戲並無增加青少年暴力行為。

其實過往都有唔少學術研究證明暴力行為同玩暴力遊戲無關，但為期咁耐嘅追蹤研究都係第一次見，希望今次研究能洗去「打機教壞人」嘅污名。

順帶一提，曾經有位外國Youtuber邀請一班「老友記」玩《GTA V》，有人表示唔明呢種宣揚犯罪嘅遊戲有咩意義，亦有人認為遊戲並無鼓吹犯罪，更可以令內心邪惡想法得到釋放，非常有趣。唔知大家點睇打機會唔會教壞細路呢？又會唔會比你小朋友玩《GTA》？