喺早幾個禮拜，《進擊的巨人》先宣布將於今日4月完結，結束長達11年連戴。我信相讀者們追咗咁耐，見到自己鐘意嘅作品完結，一方面非常欣慰，另一方面又會好空虛。最近有日媒做咗個網上統計，訪問200名20至39歲男女，問佢哋最想喺死前見到邊套動漫作品完結。

排名分別：
1.《名偵探柯南》－青山剛昌
2.《ONE PIECE》－尾田榮一郎
3.《HUNTER x HUNTER》－冨樫義博
4.《玻璃面具》－美內鈴惠
5.《骷髅13》－齊藤隆夫
6.《JoJo奇妙冒險》－荒木飛呂彥
7.《烙印戰士》－三浦建太郎 & 《KOBO 看天下》－植田正志
9.《KINGDOM 戰臣》－原泰久
10.《第一神拳》－森川讓次
11.《巴得利奧！》－魔夜峰央 &《王家的紋章》－細川智榮子與芙〜みん

（圖片︰imdb）

係咪有啲意外《HUNTER x HUNTER》只係排第三（9％）。從1998年開始連載至今（休刊中），就算過咗23年，但只出版咗36冊單行本。作者冨樫義博經常休刊，話唔畫就唔畫，非常有性格，想睇結局可能真係可能要等個孫燒比自己先得啦。

（圖片︰imdb）

最近破1000話嘅《ONE PIECE》，從1997年連載至今長達24年，目前已出版97冊單行本。作者尾田榮一郎曾表示打算大約2025年完結，有追開海賊王嘅朋友應該都見到劇情走入最後大直路，睇嚟可以喺有生之年見證一代大作完結。唔少日本網友都表示好期望見到路飛成為海賊王同知道「ONE PIECE」究竟係咩。

（圖片︰imdb）

第一名《名偵探柯南》，由1994年連戴至今，已出版98冊單行本。通常提起柯南，好多人都會問點解柯南咁多年都無長大過？對於呢個問題，劇場版《名偵探柯南：零的執行人》導演立川讓曾表示，雖然漫畫連戴咗千幾話，但劇情時間只經歷咗5個月。咁計下條數，即係平均一日要破6單殺人案？柯南果然係「死神」，去到邊都有人死。唔知如果訪問對象係香港人，個排名結果會唔會都係大同小異呢？