Marvel嘅電影未必套套好睇，但Marvel嘅選角就可以稱為「百發百中」——至少你冇覺得邊個角色用錯演員，亦唔會好似隔離DC咁拍拍下又話要換人做呀係咪？不過原來Marvel嘅演員依然都會擔心自己被人炒魷，例如Tom Holland就承認自己拍完《Captain America: Civil War》之後就一定會被人炒。

圖片：IMDB

你或者以為Tom Holland覺得自己會被人炒，係因為佢惡名昭彰嘅劇透行為，不過據Tom Holland於《Variety》中接受同樣出演過Marvel作品嘅演員Daniel Kaluuya訪問時就話，佢之所以覺得自己被人炒，純粹就係因為Marvel冇人理佢。

「由拍完《Civil War》到《Spider0Man: Homecoming》之間嘅嗰段時間，我深信自己係被Marvel炒咗，我都唔知點解。嗰陣《Civil War》未上，而又冇任何人話我知黎緊會發生咩事，我都解釋唔到點解會有呢種諗法，個感覺非常差。但到最後好明顯佢哋就冇炒我啦！每一分鐘我都鍾意呀！」

圖片：IMDB

Marvel嘅保密功夫唔單止對外，對內亦落足心機。例如Tom Holland就曾於多個訪問中透露，當年佢為《Homecoming》試鏡後，要等到睇新聞先知自己中咗。而佢亦於新訪問中透露更多試鏡細節，佢話整個試鏡過程非常漫長，總共六次試鏡橫跨半年時間，而過程中Marvel係唔會透露任何結果。「有次有我同另外六個人，仲有Robert Downey Jr一齊試鏡。我經理人同我講Marvel鍾意我就因為我唔識即興，淨係識跟足劇本。但第一Take RDJ就成場戲改哂，於是我哋就開始亂黎。雖然咁講有啲囂，但試鏡完咗之後我打畀阿媽話，我覺得我得咗！」