錄音帶，或者叫「卡式帶」，係一種曾經一街都係，但依家幾乎只有30歲以上中年人先知係咩、幾乎只有鴨寮街先有人賣嘅「歷史文物」。不過喺日本，近年就掀起一陣「錄音帶」熱潮，當年賣十蚊八蚊嘅錄音帶——講緊普通一餅帶，唔係歌手出嘅專輯——依家喺日本可以炒到百幾銀一盒！究竟係咩原因？

圖片：NHK

日本錄音帶最早於1966年由Maxwell開始生產，1979年Sony推出Walkman之後推動錄音帶銷量，到1989年到達銷售高峰，當年賣出超過5億盒，但後來隨住MD、CD等新媒體興起，錄音帶亦漸漸被取代，其中最高級嘅「Metal (亦即IV帶)」更於2001年從日本停產。目前日本只有Maxwell仍然生產錄音帶，每年大約生產800萬盒普通級別錄音帶——有趣嘅係，呢800萬餅錄音帶大致上都賣得哂，亦係點解音質更好，但已經停產嘅IV帶會被炒起嘅原因。

咁實在啲人買錄音帶返黎為咩呢？一方面有習慣使用錄音帶嘅老人家繼續支持，另一方面就係因為30歲以下、連CD都未必有買過嘅日本年輕人，反過來將錄音帶當係新嘢咁追捧。新宿嘅Tower Vinyl商店更有擺放「錄音帶專區」，而且唔單止係賣當年推出嘅舊歌，更有如Mariah Carey於去年12月推出嘅《Here We Go Around Again》、又或者坂本冬美去年11月推出嘅《ブッダのように私は死んだ》等新作。

圖片：NHK

一方面係因為「古老當時興」嘅時尚定律，亦因為錄音帶本身嘅顆粒感音色、獨特外型設計，令錄音帶再一次走進日本大眾目光，貌似就重獲新生。咁搞法再過多幾年，會唔會炒返起CD呢？

資料來源：NHK