近呢廿年嚟遊戲製作發展一日千里，仲記得當年打機都係玩緊2D像素畫面，見到有個公仔郁下郁下已經覺得非常過癮。最近由Epic Games開發嘅遊戲引擎「Unreal Engine」出咗新工具「MetaHuman Creator」，聲稱任可人都可以喺幾分鐘入面創造出超逼真角色。雖然如果大家唔係做個範都應該無咩需要用到，但都可以睇下依家啲遊戲製作技術可以整到幾逼真。

據官方介紹，「MetaHuman Creator」可以同運動捕捉及動畫技術結合使用，從而製作出逼真人物角色，應用於遊戲、電影及劇集上。

從示範影片可以見到，喺「MetaHuman Creator」按幾個制就可以修改角色髮型、膚色、體形等，對遊戲開發者嚟講絕對方便咗唔少。但對一般人而言，見到啲角色無論講野定係眨眼都非常自然，令人好期待日後嘅遊戲可以帶嚟更「真」嘅體驗，如果可以用埋VR眼鏡玩就更正。