日本動漫《鬼滅之刃》風靡全球，劇場版電影《鬼滅之刃劇場版 無限列車篇》更於日本及各地大破票房記錄。不過主角炭治郎耳飾上嘅旭日旗圖案就觸動到唔少人神經，被指令人聯想到二戰日本皇軍。近日動畫版《鬼滅之刃》於韓國Netflix上架，引起韓國網民不滿，Netflix隨即推出「修正版」，將旭日旗改成為四行橫線息事寧人。

其實炭治郎旭日旗耳環唔係第一次惹引起爭議，電影《鬼滅之刃劇場版 無限列車篇》上年喺韓國上映前，就已經被指被指圖案帶有軍國主義象徵，加上原作者及製作團隊又發表過唔少右翼言論，當時有韓國網民就大罵《鬼滅》粉絲都係賣國賊，最終電影公司選擇修改圖案後上映。

《鬼滅之刃劇場版 無限列車篇》韓國版海報已修改旭日旗圖案。（圖片截至：edaily）

而最近動畫版《鬼滅之刃》於韓國Netflix上架，所播出嘅竟然係日本原裝「無修正」版本，當然再次引起韓國網民不滿。據日媒livedoor報導，韓國民間組織「韓國網路外交使節團（VANK）」更要求Netflix加註「日本是戰犯國」，但Netflix只係好快手咁推出「修正版」，並無加註其他字眼。

「修正版」嘅耳環從旭日旗變成四條橫線。（圖片截至：livedoor）

有趣嘅喺，現時韓國出版嘅《鬼滅之刃》漫畫仍然有旭日旗圖案，相信如果被韓國網友發現，好快又要推出「修正版」漫畫。

現時韓國出版嘅《鬼滅之刃》漫畫仍保留旭日旗耳環。（圖片截至：livedoor）