最近Apple傳聞不斷，除咗多方消息指Apple將於3月23日將舉行今年首場發布會，最近又有第三代AirPods實機照片流出，如果發布會傳聞屬實，呢部第三代AirPods好有機會喺月底正式推出。

大約喺兩個禮拜前，我哋曾經報導過有中國媒體公開疑似第三代AirPods，近日就有外國網友流出更加多實機照片。驟眼睇落同上次流出嘅相差唔多，同樣係貌似AirPods Pro，但耳機柄變得更短、充電盒變得更細。至於先前流出所講嘅「使用者可以選擇是否搭配耳塞使用」，從最近洩漏照片可見，耳機充電盒並無多餘空間放置耳塞，所以應該就唔跟耳塞啦。不過如果無耳塞，就算有主動降噪（ANC）都應該會幾嘈下。

GizmoChina隨即整咗新渲染圖，猜測第三代AirPods最終上市究竟係咩樣。不過我睇睇下發現，點解咁似《Plants vs. Zombies》入面啲豌豆嘅？