日本學校嘅學期通常係於3月完結，換言之呢排就係中小學去畢業旅行嘅大好日子。可惜因為疫情關係，大家睇漫畫一定睇過嘅「關東學校去關西旅行、關西學校去東京」今年就無法實現。有見及此，日本神奈川縣川崎市市政府就決定直接包起東京都「讀賣樂園」作為川崎小六生嘅畢業旅行地點，而呢個安排亦吸引到日本電視台TBS去到現場採訪——而就係呢個採訪，令到兩位小學生成為全國話題！

卻說TBS本身係想入去睇下班小學生玩成點，點知途中竟然遇上一個男生要向一名佢鍾意咗六年嘅女生告白！喺鏡頭面前要告白已經夠大壓力，最慘係個男仔仲要被個女仔當面拒絕！告白失敗都算啦，TBS仲要將呢個片段放喺全國新聞時段播放，換言之全日本人都知道呢個男仔告白失敗，係真真正正嘅全國公開處刑！作為一個男人睇圖都戥佢傷心呀！！

圖片：Tomcat.2ch.sc

片段播出之後當然引起一陣網絡熱話，唔少人都話咁搞法都會令個男仔成世都有陰影，亦有人話個女仔嘅反應非常冷淡；不過亦有人話個男仔明知有人影住都照去馬，係非常勇敢嘅表現，「唔想樣衰又自尊心奇高嘅人只會一生孤獨」，亦有人話「這就是青春！」唔知大家又點睇呢？

資料來源：Tomcat.2ch.sc