最近台灣壽司郎推出特別優惠，只要姓名上有「鮭魚」兩個字就可以免費任食，有二兩字同音或一個字同音都分別可以獲得全單5折及9折。結果活動推出後，引發全台改名熱潮，綜合各媒體報導，現時已經有過百人為咗免費食壽司而改名。

（圖片截至：Facebook@台湾スシロー 台灣壽司郎）

日本知名連鎖壽司店「壽司郎」，除咗喺香港人氣大熱、大排長龍之外，喺台灣亦廣受歡迎。台灣壽司郎於3月15日喺Facebook上推出「愛的迴鮭」計劃，表示只要客人個名入面有「鮭魚」或有「鮭魚」同音字都可以喺3月17-18日獲得特別優惠。名字上有「鮭魚」兩字（例如陳鮭魚）可以直接免費任食；而名字上有兩個同音字（例如王瑰瑜），則可獲5折；名字上有一個同音字（例如陳小圭），則可獲9折。

（圖片截至：Facebook@台湾スシロー 台灣壽司郎）

活動推出後，短短幾日就引發全台改名潮。綜合各媒體報導，截至17日，台北市有20人改名、新北市26人、桃園市14人、新竹縣市5人、台中市22人、彰化縣2人、雲林縣1人、台南市13人、高雄市29人、屏東縣1人，總共至少133人為咗免費食壽司改名做「鮭魚」。

或者你會點解佢哋情願畀錢改錢都唔畀錢食壽司？據了解，台灣人改名只需要$80台幣（約$20港幣），所以點計都平過直接畀錢去食壽司。

（圖片截至：Facebook@內政部）

今次事件亦引起台灣政府關注，內政部就提醒大家根據《姓名條例》規定，每個人只有3次改名機會，所以唔好亂改，如果唔係到時就「實至名鮭」。

睇開嘅朋友就會知係邊個平台。（圖片經過處理）

期後有成人影音直播平台「跟風」推出優惠計劃，表示只要名字入面有「鮑魚」兩個字就可以免費7天任睇直播，唔知會唔會引發另一波改名熱潮呢？