由史泰龍出演嘅《Rocky》系列電影深入民心，每次聽到主題曲「Eye of the Tiger」都彷彿充滿力量。最近史泰龍就喺Instagram宣布目前寫緊《Rocky》前傳影集大綱，發掘Rocky成為拳擊冠軍之前嘅故事。

（圖片截自：IMDB）

對上一部《Rocky》電影已經喺2006年嘅《Rocky Balboa》，雖然其後有推出外傳系列電影《Creed》，但史泰龍唔擔任主角，而係飾演拳擊教練訓練Michael B. Jordan。

史泰龍喺Instagram公開《Rocky》前傳影集兩頁大綱，並喺內文表示「呢篇可能係我出過最奇怪嘅文，我今朝開始為《Rocky》前傳寫大綱，希望能夠以一季十集嘅形式推出，從而深入採討角色年輕時嘅內心世界，並希望計畫能成真。」

在 Instagram 查看這則帖子

Sly Stallone（@officialslystallone）分享的帖子

史泰龍個兩頁非常「鳥草」嘅大綱提到，「想象一下，有部時光機可以將我哋帶返去《Rocky》嘅起源...回到歷史上最具變革性嘅60年代。」同時例出一連串發生喺60年代嘅大事，例如人類登陸月球、民權運動、美蘇冷戰同女權運動等等。希望前傳劇集能夠聚焦「Rocky」喺呢個動盪社會入面點樣「相對平淡地生活」。

美國喺1969年7月成功登陸月球。

佢繼續寫道，「當我喺1976年第一次認識『Rocky』，佢係一個非常失落、被遺忘、虛度生命嘅人，直到佢接觸拳擊，漸漸成為一個勝利者。現今呢個年代，我們都可以見到好多好似『Rocky』咁嘅年輕人，為咗尋找自己定位而努力掙扎。」

（圖片截自：IMDB）

雖然史泰龍份大綱有啲空泛，又無提及想搵邊個演員出演，但毫無疑問，呢個消息已經令影迷充滿期待。