《Metal Gear Solid》系列主腦小島秀夫離開Konami後成立小島工作室，並於2016年推出第一部、亦係目前唯一一部作品《Death Stranding》，數數日子都已經係五年前，亦即係話小島工作室理應好快就會推出新作。不過據外國媒體報導，小島工作室嘅新作，並唔係昨日公開預告嘅《Abandoned》，甚至根本唔係Playstation作品，而係轉會XBOX推出獨佔作品。

成件事係咁嘅：Playstation官方Youtube於4月8日發佈咗一隻叫《Abandoned》、由「Blue Box Games」製作嘅第一身恐怖射擊遊戲。齋睇條預告其實就睇唔出遊戲本身嘅水平，但由於網民發現Blue Box Games從未推出過任何大作、甚至連公司官網都摺埋，加上小島工作室「似乎係時間出新作」，於是就紛紛估計《Abandoned》係小島工作室最新作品，「Blue Box Games」就只係用黎遮掩嘅空殼公司。

不過據《Venturebeat》報導，小島工作室與《Abandoned》毫無關係，最有力嘅證據就係據佢哋嘅消息來源，小島工作室目前正與Microsoft商討發開下一部遊戲，所以新作唔會係Playstation遊戲。而早前XBOX負責人Phil Spencer於線上訪談中，背後嘅展示架亦放咗大大個小島工作室嘅吉祥物Ludens人偶，仲要放喺XBOX發光標誌隨離，當時亦有人估計是否暗示XBOX與小島工作室會有合作。

《Venturebeat》指目前未知Microsoft與小島工作室嘅商討去到咩地步，但就話Microsoft有意借助與小島工作室嘅合作黎加強與日本遊戲創作者嘅聯繫，似乎係為「反攻」日本市場作準備。