唔理你鍾唔鍾意佢嘅演技及作品，但「The Rock」Dwayne Johnson 的確係目前最賣座、最受歡迎嘅荷里活男星。而正如香港嘅大家會叫發哥去選特首，美國方面亦一直有人支持The Rock去選總統，而佢本人亦一直冇否認有呢個計劃，根據美國媒體做嘅最新民調，更發現有46%美國成年人支持佢參選。

圖片：Piplsay

早於幾年前坊間就已經傳The Rock有意參選總統，而The Rock嘅口風亦由早期嘅「有可能」到「認真考慮」，更曾經提出過「最快參選2024年總統選舉」嘅時間表。轉眼間黎到2021，下屆美國總統選舉就係2024年，美國網站《Piplsay》近日舉行咗個民意調查，訪問超過30,000名成年美國讀者關於藝人們參選嘅支持度。結果發現有17%人支持The Rock參選，有29%人同時支持The Rock以及另一名有意從政嘅演員Matthew McConaughey參選，加埋就即係有46%人支持The Rock選總統！ (同樣計法下，Matthew McConaughey都有41%支持率)。

在 Instagram 查看這則貼文

therock（@therock）分享的貼文

雖然話支持佢參選唔代表最後會投票畀佢，但有近半人支持The Rock參選都已經相當犀利。The Rock於個人IG轉發報導表示「我唔認為美國國父們會預料到，有朝一日會有個六尺四高、黑人及薩爾瓦人混血、好鍾意飲Tequila、揸Pickup Truck、揹大媽腰包嘅光頭紋身佬會加入佢哋嘅行列。但如果呢件事真係發生嘅話，為美國人民服務係我嘅榮幸。」

The Rock曾經講過，如果人民真係想佢參選，佢就會參選。依家人民嘅意願已經呼之欲出，The Rock又會唔會以行動回應，就要睇下黎緊一年嘅發展啦。

資料來源：Piplsay