近年中國廣電總局嚴打紋身文化，凡係有紋身嘅藝人上節目，後期製作都會將紋身部位打格仔，有明星就索性每次上節目都著長袖衫或戴手袖。本以為相關規範只適用於電視節目，點知原來二次元嘅動漫領域亦受監管。最近有網民就發現Bilibili版《極主夫道》主角身上所有紋身被刪走，變得皮光肉滑。

Twitter網友Abalamindo就整合咗張對比圖（左邊為Bilibili版；右邊為Netflix版），可以見到本來佔咗整個上身8成嘅紋身，被修正得白白滑滑。未知係動畫組一開始就有製作無紋身版本，定係Bilibili後期修正，如果係後者嘅話，真係不得不佩服佢哋嘅心機同技巧。

（圖片截自：Twitter@Abalamindo）

網民們就留言抽水「喺邊間美容院做激光㗎？咁乾淨嘅？」、「負責畫紋身嘅動畫師喊緊...」、「如果臉上有紋身嘅角色會點算？」。

《極道主夫》故事講述一位有「不死之龍」稱號嘅黑道大佬因為愛人而金盤洗手變成家庭主夫，處理各種日常家頭細務，搣唔甩嘅大佬性格令佢搞出唔少笑料。