喺香港，所有問題都係土地問題，雖然每個人心入面都有個理想單位，但要實際買到對好多人黎講都一個遙不可及嘅幻想。喺美國，有個理想屋企但係買唔到嘅人亦不在少數，而且呢班人更加好鐘意去樓盤網站「Zillow」到睇樓 (嘅相) 當興趣，甚至願意為咗上網睇樓而放棄做愛！

圖片：Californiacontractorbonds.com

「Zillow」係一個美國樓盤網站，實際上同香港嘅睇樓網冇咩分別，但單單係2020年就吸引到2.45億次不重覆訪客，更衍生出「沉迷Zillow」嘅社會現象，即係啲人太鍾意上Zillow睇樓，直頭影響埋日常生活。美國一間保險公司於今月進行一個調查，就發現1000名受訪者中有近95%都有瀏覽Zillow嘅習慣，有超過6成人每日睇1個鐘或以上，誇張起上黎更加係每日睇5個鐘。

睇樓用咗咁多時間，明顯地就要放棄其他日常活動。調查同樣發現分別有近6成參加者曾經因為掛住睇Zillow而取消與朋友嘅聚會、遲咗出門口、甚至Miss咗一啲重要Deadline。更嚴重嘅係當被問到，睇Zillow同做愛二揀一，有48.6%人係揀睇Zillow。

圖片：Californiacontractorbonds.com

至於點解啲人咁鍾意睇樓？調查發現大部份人都唔係真係想搵屋搬。53%人話佢哋係去睇公司老細間屋值幾錢、62%人就係去睇隔離鄰舍間屋值幾錢，30%係睇住啲樓盤幻想下自己住咗入，27%人更加係當輕鬆活動。調查亦指去年因為疫情及相應嘅隔離措施，所以網站瀏覽量上升，特別係最冇錢買樓嘅年輕人，瀏覽Zillow嘅時間急升59%。