【草根港產片】陳果又玩野香港樓價貴到離譜《鬼同你住》都要買樓上車

陳果導演係香港近代奇材，拍出好多香港地道草根風味，概念同意識都好香港仔。今次又炒一個相當貼地題材香港荒謬樓市現象，加插猛鬼元素幽默黑色表達，今年八月，真正奇幻港產片傑作《鬼同你住》（Coffin Homes）。絕對係香港人悲壯心聲，十個人行入地產搵樓，9個講明唔要兇宅，仲有一個話「最緊要平」，點為之「平」？樓價三成堅猛鬼你住唔住？鬼叫你窮呀頂硬上！我怕鬼，但更怕做窮鬼絕對係香港人最Poor Guy寫照！

今次電影由安樂影片榮譽發行，繼《餃子》、《紅VAN》及《三夫》後，香港草根導演陳果又一套奇幻傑作《鬼同你住》（Coffin Homes）將於8月暑假公映。對上一次奇幻玩野係合拍大作，玩到九龍出水的「九龍不敗」。利用合拍資金拍出經典，可以與「喜馬拉雅星」再相提並論的有趣作品，相信會係電影界最不能不看的經典。今回新作堅香港風格回到主場的新片《鬼同你住》我相當有期望中又帶「奇望」！由陳果導演自編自導，電影將猛鬼元素注入香港荒謬樓市現象，並請來老拍檔黃又南、邵音音，及久休出山的四魔女魏秋樺、文雪兒、麥家琪、李麗珍合作，連同車保羅、太保、張達明、陳湛文等多位演技派演員，匠心獨運，將「同鬼住可怕定無屋住可怕」的香港土地供應問題，用陳果一貫黑式幽默方法呈現！

最近釋出的前導預告分別以「豪宅篇」及「劏房篇」為題，陳果導演巧妙以誇張樓盤廣告形式展現戲中凶宅特色， 「豪宅篇」將凶靈氣勢加入香港黃金重地， 戲勢磅礡 ; 「劏房篇」則結合香港劏房特有的緊密細小凶間，陰風送爽，拍案驚奇。由於預告尺度過激，部分敏感畫面只能網上睇，無法係公眾地方播放！

陳果導演道盡香港人心聲：「香港樓價貴到離譜，搵鬼住咩！ 」陳果向來以電影諷刺社會的荒誕現象，導演表示新戲《鬼同你住》將道盡香港人買唔起樓的心聲：「新戲反映香港樓價貴到離譜，不是一般人住得起的現象，甚至參照了『搵鬼住咩！』的口頭禪之下構思出來。為了呈現市民不惜以低價買凶宅、明知有鬼同你住都要上車的荒誕，我用黑色喜劇拍出香港人為樓瘋狂，甚至末世的癲狂狀態，希望觀眾有共鳴。」

故事大綱：

到底無屋住恐怖，定係間屋有鬼恐怖？地產經紀阿源（黃又南 飾）為了豐厚佣金，明知樓盤是凶宅卻仍落力游說睇樓客上車, 怎料反被高佬鬼（車保羅 飾）纏上；4姊妹（魏秋樺、文雪兒、麥家琪、李麗珍 飾）為了阿媽（邵音音 飾）棟別墅，日日圍著病床前期盼她早日歸西,面對這班「孝女」，好難死得瞑目；阿祥（太保 飾）扭盡六壬，千方百計將自己層唐樓改裝成10多間劏房出租謀利, 但小鬼強仔老是常出現大搞破壞… 最草根的金像導演陳果，再次道盡香港人心聲，以嬉笑怒罵的猛鬼凶宅，寫下香港樓價貴到唔係「人」住的怪奇物語。