日本著名音響品牌Accuphase金嗓子向來係追求質素，以High End高姿態製造嘅卓越產品。每一部產品用料手功都盡顯日本匠人誠懇及嚴謹態度，四十年來產品有價有市。Accuphase最新宣布6月中將會推出全新CD機DP-450，為二聲道音響世界同成熟的CD市場帶來可能係最後嘅衝擊。

Accuphase香港人慣稱為金嗓子，向來以金光閃閃面板同出色的聲音俘虜人心，旗下產品向來係二手市場歷久不衰，靚聲保值！今次推出最新純CD播放機DP-450，雖然定位並非旗艦級別，但就由旗艦型號中下放大量技術。機械部份，廠方特別提高左光碟盤的讀取精度，並新開發左專用的彈性阻尼器，有效抑制共振頻率下的振動傳遞，同時透過可針對橫向震盪的彈性阻尼器，進一步降低振動傳至雷射光頭上。機械結構方面，CD盤安裝於堅固機械底座，上方則安裝了橋樑提高剛性，橋體與機板之間為開孔式三層結構，將CD盤的旋轉和震動噪音完全隔絕，據稱與上一代 DP-430 相比，光學抗震性大幅提高 10 倍之多。

當代CD機最重要的係解碼晶片，DP-450使用 ESS 製作的 ES9026Pro，採用四回路並列設計，加上廠方獨家 MDS+方式來降低模擬至數碼變換時的誤差。數碼濾波器繼承左同門高階型號的「Direct Balanced Filter」電路，同時 DP-450 更加係此系列中首次引用高性能運算放大器「LME49720」，每個輸出均採用獨立電路，大幅減少線路與平衡輸出之間的干擾。 DP-450 係新世代可以獨立充當解碼器使用，機身設有一組兼容 USB 2.0 數碼輸入，另亦設有一組光纖以及一組同軸，USB 輸入最高支援 PCM 為 384kHz / 32bit 或 DSD 11.2MHz（只支援 ASIO），USB 驅動程為最新的 Ver.3，可對應 DELA 無標記 DSD 播放。同所有高階CD播放機一樣模擬輸出有 XLR 和 RCA兩種組合，另可以勉強作數碼輸出以光纖和同軸輸出當轉盤，不過相信無咩人會咁應用。

廠方據說將大量高階型號技術下放至 DP-450，雖然光碟部份只能播放 CD，並未能重播SACD，但由於解碼能支援 DSD 並設有 USB 數碼輸入，因此用戶依然可透過連接 CAS 系統，播放 DSD 格式的音樂檔案。可能好多人都會有疑問點解今時今日要唔要買CD播放機， 然而真係要建立一套高階兩聲道音響組合來講，一部實用而又有質素嘅cd播放機係必備之選，金嗓子手工用料外觀甚至二手價值都係同級最卓越嘅選擇， 如果你認為金嗓子出新機我哋又幫佢賣廣告， 咁你可能就唔太熟悉音響，Accuphase出新機，就算咩都唔革新光轉變型號名稱都有新聞價值，因為每一步金桑子嘅機器保養得宜都可以高價賣返出去，所以了解金嗓子每一代推陳出新，係精明音響玩家的選擇。

資料來源：https://www.accuphase.co.jp/model/dp-450.html