正如大家過往一年所見，當人們患有嚴重呼吸系統問題嗰陣，好多時都需要透過呼吸機維持生命，奈何面對突如其來嘅大量肺炎患者，呼吸機設備往往供不應求。最近有日本研究團隊，以海參、鯰魚等海洋生物為參考對象，研究出肛門腸內呼吸方法「Enteral Ventilation via Anus，EVA」，將含氧液體注入豬隻及老鼠肛門，成功讓哺乳類動物透過肛門吸收氧氧，為肺病患者帶嚟全新轉機。

一般哺乳類動物都係透過肺部呼吸，然而有部份海洋生物，例如海參、鯰魚、泥鰍等等，就能透過腸道呼吸。由於哺乳動物直腸黏膜充滿微細血管，所以透過肛門塞藥往往都好容易進入血管，東京醫科齒科大學教授武部貴就非常好奇，係咪用同樣方法都可以將氧氣輸入體內。

於是研究團隊展開實驗，將含有氧氣嘅全氟萘烷（Perfluorodecalin）溶液灌入老鼠及豬隻肛門，最終發現實驗動物能夠從缺氧狀態迅速康復。武部貴形容今次實驗相當成功，或能為肺病患者帶嚟全新供氧方法，計劃最快喺出年展開臨床實驗研究。

【衝撃】尻から酸素、呼吸不全を改善　コロナ治療に応用も | 2021/5/15 - 共同通信 https://t.co/z42aGqv5ob

「LCLをお尻からって…僕だってそんなことされたことないよ！どうなってるんだよ父さんッ❗️ミサトさんッ⁉️」

【エヴァ法】…#エヴァ(法)がコロナから救う未来がくる？(微妙に違うけど凄い！

— 緒方恵美「再生(仮)」「劇薬-dramatic medicine-」発売中 (@Megumi_Ogata) May 14, 2021

由於呢個呼吸方法名為EVA，令到好多人都諗起《新世紀福音戰士》嘅LCL液體，就連碇真嗣配音員緒方惠美都喺Twitter轉發新聞。不過，雖然兩者同樣透過液體呼吸，但《新世紀福音戰士》係用LCL浸著個肺而獲得氧氣，並唔係好似武部貴教授咁從肛門灌入含氧液體。