日本遊戲大廠Square Enix於今日舉行《勇者鬥惡龍》系列35周年直播，公布多款DQ新作，當中包括萬眾期待嘅《勇者鬥惡龍12》。DQ之父堀井雄二表示，今部作品比較黑暗同埋成人向，玩法上仍然會保留指令戰鬥系列，但將會有非常大改變。遊戲目前處於開發階段，未知具體上市時間。

Square Enix於直播活動尾聲壓軸播出《勇者鬥惡龍12》預告片，雖然條片冇任何實際遊戲畫面，就咁得個Logo，但可以見到整體風格比起過往作品「黑暗」得多，加上旁白配上一句「人為什麼要活著？（人はなぜ生きるのか）」，確實令人耐人尋味。

除咗《勇者鬥惡龍12》之外，今次直播活動亦公布多款DQ新作，其中有兩款值得大家關注一下。第一款係《HD-2D版 勇者鬥惡龍3》，顧名思義就係重製版遊戲，將2D像素角色以3D背景呈現，並未透露具體發售日期以及咩平台上架。堀井雄二表示未來有機會用同樣方法重製埋第1及第2代。

而另一款就係全新作品《勇者鬥惡龍 TREASURES》，由細路版嘅卡謬同瑪雅擔任主角，講述兩兄妹童年故事，到世界各地尋寶，同樣未知具體發售日期以及咩平台上架。

資料來源：《勇者鬥惡龍》系列35周年直播@Youtube