相信絕大部份男士都有睇AV嘅習慣，但呢個世界亦有一班人係認為認為AV歧視及物化女性，最好就係直頭禁鬼咗佢。驟眼睇，支持禁制AV嘅人似乎係支持兩性平等，不過跟據美國一個研究，原來支持禁制AV嘅人，其實比起睇AV、支持AV合法化嘅人係更傾向歧視女性。

根據一個發佈於《The Jounrna of Sex Research》嘅研究，加拿大新不倫瑞克大學 (University of New Brunswick) 心理學系嘅一班研究員，以2010-2018年間美國總合社會調查 (General Social Survey) 所收集到嘅7400名美國成年人數據，分析「支持成人影片合法化」、「成人影片使用習慣及頻率」以及「對性別平等意見」之間嘅關係。

結果發現，係撇除受訪者性別、年齡、宗教、教育程度等變數下，支持AV合法化嘅人更傾向反對「男性比女性更適合政治」、「女人嘅角色係湊仔而唔係出去搵錢」、「阿媽出去做嘢個仔就會好慘」之類帶有歧視女性意味嘅陳述；而要求全面禁制AV嘅人，就反而更傾向支持上面嘅陳述。換言之要求禁制AV嘅人雖然以「AV歧視女性」為由，但實際上佢哋先係更傾向歧視女性嘅人。

研究員亦指出，「睇唔睇AV」同「歧唔歧視女性」之間雖然有一定關係，但亦同時被受訪者嘅社會、宗教、政治特徵影響，換言之，「支持禁AV」同「更傾向歧視女性」好可能係受訪者社會、宗教、政治特徵引致嘅結果。而目前能夠下嘅結論就係，一個會睇AV、支持AV合法化嘅人，係更傾向唔會歧視女性——相信大家都係啦？