情侶之間少不免會嗌下交，大部份人都會選擇分開一陣，等大家冷靜落嚟再傾返件事。不過烏克蘭有對情侶就反其道而行，為咗挽救感情忽發奇想用鐵鏈鎖緊彼此，無論食飯、沖涼、瞓覺更甚至返工都一齊。可惜計劃並冇如願以償，兩人經歷完123日「連體嬰」生活後，最終宣布分手收完，本來計劃好嘅結婚大計亦無疾而終。

綜合外媒報導，33歲嘅Alexander Kudlay同29歲嘅Viktoria Pustovitova喺今年情人節開始用鐵鏈鎖緊彼此，自此兩人就好似「連體嬰」咁生活，生活大小事都會一齊做（我比較好奇佢點著衫），Viktoria會陪住從事汽車零件銷售工作嘅Alexande返工，而Alexande都會陪住做美容嘅Viktoria幫客人整假睫毛，並透過Instagram分享佢哋嘅「甜蜜」生活，兩人喺外人眼中就係一對如膠似漆嘅情侶。

當然事情並非一帆風順，除咗Viktoria去女廁嗰陣會非常唔方便，亦因為Viktoria被鎖鏈磨損手腕搞到發晒炎而差啲提早中止實驗，不過佢哋就冇理醫生建議，戴上手套後就繼續實驗。

去到5月19日，佢哋已經綁埋一齊嘅日子已經遠超原定嘅3個月，更宣布打破埋烏克蘭同世界記錄，成為世上鎖得最耐嘅情侶。當時佢哋表示打算要鎖到結婚為止，希望透過呢個行為成為KOL賺幾百萬，並將其中一部份錢捐畀善機構。

隨住時間一日又一日咁過去，兩人感情開始再次出現矛盾。Alexander透過Instagram表示「困難就好似滾雪球咁增加，每當我發現一個優點時，就會即刻出現兩個缺點。Viktoria想回復過往嘅生活，佢好掛住曾經熱愛做嘅事。即使我話『我哋可以一齊去做』但佢似乎就冇咩反應。」同時Alexander亦承認自己已經厭倦喺Viktoria旁邊睇住佢化妝，好努力咁抑制自己情緒，避免大家嗌交。

可惜經歷123日，兩人最終喺6月17日決定分手收場，隨住鐵鏈被剪開，兩人正式擺脫對方，Viktoria立即大叫「萬歲，我終於自由！可能過獨立生活！」而Alexander就表示多謝大家支持，好開心自己人生有過咁嘅經歷。

雖然呢個實驗有啲極端，但兩個人太過親密確實會發現對方好多缺點，就好似你當初都估唔到原來另一半會「撩鼻屎」或者生活上有其他乞人憎嘅習慣，唔知大家又點睇呢個實驗呢？

資料來源：Daily Mirror、dailymail、instagram@sashaplusvika