幾經波折，講咗好多年嘅《奪寶奇兵5》終於喺月初正式開拍，Harrison Ford亦回歸再次飾演考古學家Indiana Jones，即使年已78歲仍然非常敬業出演打鬥戲份，奈何再鋒利嘅刀都有生銹嘅一日，近日傳出佢喺彩排期間誤傷膊頭，需要停工休養，不過迪士尼就表示拍攝進度唔受影響。自從Harrison Ford宣布回歸《奪寶奇兵5》，有唔少影迷就擔心佢身體狀況能否勝任咁多動作場面，結果最唔想見到嘅事終於發生，希望Harrison Ford能夠早日康復，呈現最好嘅表演畀觀眾之餘，亦會錫住身體。

據外媒《Deadline》報導，Harrison Ford日前喺彩排打鬥戲期間誤傷肩膊，但就冇透露具體傷勢如何。片商迪士尼就出聲明表示，拍攝工作將會繼續，並會因應Harrison Ford康復進度喺未來幾周調整拍攝日程。目前《奪寶奇兵5》預計喺2022年7月29日上映，未知今次意外會唔會令電影再度延期。

其實今次唔係Harrison Ford第一次喺拍攝期間受傷，早幾年拍《Star Wars: The Force Awakens（星球大戰：原力覺醒）》嗰陣，就曾經被「Millennium Falcon（千年鷹號）」嘅液壓門夾斷腳，當時仲要做手術同復健治療，希望今次意外可以令片商重新審視演員拍攝期間嘅保護措施。

資料來源：Deadline