相信平時搭開新巴城巴嘅朋友，對嗰張紫色座椅都唔會陌生，尤其係勞碌完一日搭車返屋企，有得坐喺上面吹住冷氣瞓覺未嘗唔係一件幸福小事。最近新巴城巴就推出咗同款電腦凳，強調符合歐盟安全標準，而且膝部空間充裕，就算1.8m高都唔會頂腳。

（圖片截自：Facebook@新巴城巴 NWFB and Citybus）

據介紹，新巴城巴座椅主要由意大利品牌Lazzerini出品，今次發售嘅就係CityLight款式曾經喺多部巴士服役過，並於2021年拆下經過基本清潔及細心檢查，確保張凳冇穿冇爛先賣，而且首批座椅會附送獨立編號金屬證書，增加收藏價值，售價為$950港幣。

（圖片截自：新巴城巴eshop）

其實之前一個名為「精靈巴士工作室 Pokebus Workshop 」嘅Facebook專頁都賣過類似產品，不過就係九巴嘅粉紅色Lazzerini座椅，除咗有關愛座之外，仲有分有安全帶或冇安全帶版本。如果要二揀一，大家又鍾意坐九巴定係新巴城巴嘅凳多啲呢？

之前有巴士迷製作過九巴電腦凳。（圖片截自：Facebook@精靈巴士工作室 Pokébus Workshop）