早年香港嘅夾公仔機鋪開到一街都係，唔少人亦沉迷於呢個既考技術又考運氣嘅消閒活動。不過有夾過嘅都知道，夾公仔可以夾極都唔中，非常燒錢，SEGA美國近日因為夾公仔機嘅機制而被索價500萬美金。

夾公仔界中有個術語叫做「保夾」，亦即只要你累積入夠某一個金額，個夾就會突然變得非常大力，令大家成功夾到嘅機會大增，反過黎講就即係如果唔係「保夾」，夾到嘅機率就會變得非常低。

美國一名叫做Marcelo Muto嘅玩家就向法庭控告美國SEGA誤導客人，話佢哋嘅「Key Master」夾公仔機宣稱「純考技術」，但由於「保夾」機制嘅存在，實制上就係防止玩家成功夾到。控方指如果知道夾公仔機會限制夾到嘅機會，客人根本就唔會畀錢、至少唔會畀咁多錢去玩，所以控告美國SEGA誤導顧客並索儐500萬美金。

今次並非同類型嘅夾公仔機於美國第一次被控告。2019年時亞利桑那州州檢察長就發現Key Master嘅機制違反該州法例，「亞利桑那州法例，禁止賭場之外的任何遊戲機，擁有令經營者能影響玩家勝出機率的機制」。最後一間於當地批發Key Master的公司賠償100萬美金。