自2002年《Insomnia（白夜追兇）》開始，名導Christopher Nolan就同華納兄弟展開長達近20年合作關係，期間製作過「The Dark Knight Trilogy（蝙蝠俠三部曲）」、《Inception（潛行凶間）》、《Interstellar（星際啟示錄）》、《Dunkirk（鄧寇克大行動）》、《TENET天能》等等經典作品。不過自從華納喺上年宣布推出戲院/串流平台同步上映計劃後，隨即引起「戲院體驗派」嘅Nolan強烈不滿，並公開批評對方做法，當時《華爾街日報》更指出Nolan可能因此同華納決裂。

雖然近年Netflix不斷擴張，先後邀請到Steven Spielberg（史提芬·史匹堡）、Zack Snyder、Alfonso Cuarón多位大導加入陣營，但似乎佢哋仲有更大嘅目標。最近Scott Stuber接受Variety訪問時提到「如果Nolan要拍新戲，我哋就會諗Netflix會唔會係佢嘅歸屬，要做咩先可以實現呢個目標。佢係一個了不起嘅電影製作人，我會盡我所能。喺呢一行我學到唔可以有任何自滿，令我被擊倒都可以再次起返身。」言下之意，Scott Stuber似乎表示無論Nolan拒絕幾多次，佢都會盡最大努力拉攏對方加入串流行列。

事實上，雖然Scott Stuber對拉攏Nolan加入串流平台充滿希望同堅持，但Nolan就似乎唔太可能會咁做。因為Nolan一向以戲院大銀幕放映作品而自豪，所以好多電影片段都係用IMAX格式拍攝，而且佢接受到串流平台嘅話，大可以喺華納旗下嘅HBO Max放映。如果Nexflix想成功，可能就要諗下計仔說服Nolan，可能係銀彈戰術，又或者畀佢嘅作品喺戲院優首先上映，之後先到Netflix，不過以上純屬個人猜測，話唔定Scott Stuber最後會成功呢！唔知大家又覺得Nolan會唔會接受喺串流平台播佢嘅作品呢？