有時候見到人拎住部口琴喺街吹，都會覺得口琴嘅聲好特別、好好聽，而呢個喺香港較為偏門嘅樂器，近日就準備迎來「第一屆香港國際半音階口琴大賽」。

香港口琴協會一直致力推廣口琴音樂，今年佢地宣佈將會舉辦香港首個史上最高規格嘅半音階口琴大賽，水平及規模均達到國際級別，屆時嘅評審團均由享負盛名嘅音樂巨擘及頂尖名家出任，賽事規格可以媲美如德國世界口琴節、亞太口琴節內最高級別嘅半音階口琴獨奏公開組及蕭邦國際鋼琴比賽等同類世界級音樂盛事。

而喺黎緊8月12日，賽事將會揭開序幕，大會於香港文化中心即場公佈進入半準決賽階段嘅24位參賽者，並會現場以別開生面嘅線上線下合奏形式演繹經典口琴曲目。