以色情內容打響名堂嘅訂閱制社交平台OnlyFans，日前突然宣布從10月1月起禁止發布色情內容，但仍允許部份「符合公司政策」嘅裸露相同片，隨即引起一眾「創作者」及「色途老馬」 (或者台灣稱「老司機」)嘩然。有唔少網民就擔心OnlyFans咁做只會步上Tumblr後塵，又或者會益咗競爭對手Patreon。

OnlyFans於2016年成立，目前擁有1.3億用戶。

OnlyFans於聲明表示，新政策係為咗滿足銀行合作夥伴以及支付系統供應商要求，並話確保平台可以長期營運落去，將會繼續為創作者及支持者提供包容嘅社區。另外，又強調創作者只要「符合公司政策」，仍然可以發布裸露內容，但具體準則係咩就容後公布。

相信各位「老司機」都一定聽過Tumblr呢個社交平台，早喺幾年前，佢哋就因為突然禁止色情內容，導致平台訪問量以及公司股價出現「插水式」下跌，從此一蹶不振，所以唔少網友都唔明點解明明有晒案例，OnlyFans都要冒險作出呢個決定。