唔知玩開《生化危機》嘅朋友，最鍾意邊一代呢？外界普遍都認為4代最經典，事關從呢一代開始，遊戲由固定視角改為第三人稱，並加入武器升級系統以及武器商人元素，深深影響住日後眾多遊戲，同時亦係「恐怖遊戲之父」三上真司喺CAPCOM最後一部作品。近日官方Twitter就出咗個有趣貼文，疑似暗示《生化危機 4》重製版即將登場！

4
Itchy.
Tasty.

— Resident Evil (@RE_Games) August 22, 2021

對於唔熟悉《生化危機》系列嘅朋友嚟講，見到「4、Itchy、Tasty」可能會一頭霧水，不過一班死忠玩家就紛紛解讀貫中含意。首先「Itchy.Tasty.」兩個字最早出現喺《生化危機 1》嘅管理員日記（Keeper's Diary），講述管理員感染T病毒後失去理智，喺日記最後一段寫上呢句意義不明嘅句字，其後呢本日記亦有喺《生化危機 5》DLC出現過，可以算得上《生化危機》一句經典句子。至於個「4」字，有人就認為係指第4代，亦有人覺得因為原文寫嘅係「4 Itchy.Tasty.」，所以未必係重製《生化危機 4》，而係《生化危機 1》。

《生化危機 1》嘅管理員日記（Keeper's Diary）。

近年CAPCOM相繼推出第2同第3代重製版，並獲得唔錯嘅銷量同評價，所以食住個勢重製（炒冷飯）埋第1代或第4代都係意料之中，唔知大家又想玩邊代重製版多啲呢？

資料來源：gamerant