《Monster Hunter Rise》都出咗一段時間，相信各位獵人一早完哂所有劇情、升爆哂HR、屠咗N條爆鱗龍，甚至等更新等到棄埋Game，遊戲熱潮大不如前，但隨住2021年東京電玩線上展（Tokyo Game Show 2021 Online）即將開幕，最近CAPCOM就喺官方線上商城推出一系列周邊，當中最受矚目莫過於「奇怪龍睡袋」，唔少網友都話驟眼睇以為係巨型Condom。

有玩《MH Rise》嘅朋友都知，奇怪龍外型同佢個名一樣咁奇怪，條頸能夠隨意伸縮兼有一個血盆大口，而且仲識得放電，被擊嘅話有機率進入麻痺狀態。今次CAPCOM就忽發奇想用呢隻魔物設計出「奇怪龍睡袋」，全長180cm、直徑80cm，應該一個成年男人都可以包到實一實，出到嚟個效果會好似被條龍吞緊落肚咁。

雖然唔少網友都覺得呢個睡袋好似巨型Condom，但第一波預購已經被掃清光，依加預定最快都要2022年2月先發貨，售價為29,700日圓（約$2,100港幣），有興趣嘅朋友可以到官方商城「e-capcom」了解一下。

資料來源：e-capcom