為緊貼潮流，最近可口可樂公司以電競賽事為題推出全新廣告片，不過就因為劇情過於「離地」而惹嚟大量負評，截止目前已錄得約2.6萬個Dislike，遠超Like數1,400成10幾倍，睇嚟製作團隊似乎唔了解電競賽事。

廣告內容大致講述一班選手參加一場盛大電競比賽，雙方於遊戲內展開一場激烈廝殺，打到一半主角所控制嘅獸人角色慘被KO，於事佢就走咗去拎咗支可樂飲，諗住休息一陣再戰沙場。點知飲完支可樂，遊戲入面嘅獸人就好似突然間「覺醒」，擁有自主意識唔受控制，並且掉低武器同敵人握手言和，令所有睇緊直播嘅觀眾都O晒嘴。

可口可樂似乎想透過廣告傳達和平及團結理念，但觀眾明顯唔接受咁跳脫嘅劇情安排，紛紛留下Dislike批評廣告「離地」，其中有唔少人都質疑製作團隊根本唔知咩叫電競。其實都唔難理解網友們點解會咁反感，試諗下如果個廣告轉做踢波，一班足球員踢到一半飲完支可樂就停晒手腳握手慶祝，我諗大家都會一樣咁嬲。（雖然我呢個比喻唔完全相同）