唔少人日頭就喺公司用電腦打字，放工就喺屋企用電腦打機，一日可能有十幾個鐘都坐喺電腦前面，於是個「電腦位」嘅舒適同方便性就變得非常重要。而Ikea早前就與電競品牌ROG合作，推出一大堆適合打機或者家居辦工嘅傢俱，當中仲有張價錢頗為相宜嘅電動升降檯。

整個「Ikea電競系列」總共有六條產品線，其中「UPPSPEL」就係與ROG共同開發。系列中最主打嘅就係張唔使$5000嘅電動升降檯，有140x80cm及180x80cm兩個選擇，最高升到120cm，最低就係72cm，以Ikea加ROG兩個牌頭黎講，呢個價錢都算係幾抵買。

另外品牌亦大推只需兩舊水嘅洞洞板，配上專用配件就可以張成埲牆變成收納兼展示空間。同系列中仲有電腦主機活動架、活動櫃等產品。

UPPSPEL 電競檯 HKD$4,690.0

LÅNESPELARE 用品架 HKD$199.0

MATCHSPEL 電競椅,黑 HKD$1,490.0

LÅNESPELARE 杯架 HKD$69.0、連蓋杯附飲管 HKD$69.9

LÅNESPELARE 環形燈連手機架 HKD$349.0

而「UPPSPEL」以外，Ikea亦有一大堆屬其他產品線嘅電競/電腦用品，包括多款電競椅、夾檯杯架、頸枕、可以變成Cushion嘅有袖暖氈、方便直播用嘅環形燈加手機架、滑鼠線固定器以及一隻專用黎放頭戴式耳機嘅木製手。全部都備承Ikea嘅優良傳統，實用但唔貴！

目前Ikea於旺角CGA電競館，以及深水埗高登ASUS ROG Pro Shop都有擺放相關產品，大家可以親身去試下。另外大家亦可以預約去CGA「IKEA 電競體驗館」親身進行一小時體驗，完咗除咗有IKEA優惠券一張，影相Post IG再加返Hashtag仲可以參加每星期一次嘅抽獎，獲得Ikea與ROG送出嘅電競配件 (一星期抽出兩位，名額總共八名)。