近年真人騷節目盛行，尤其主打兩性戀愛題材就最為火熱，從早些年嘅《雙層公寓》到近期嘅《慾罷不能（Too Hot to Handle）》都成功引起唔少話題。最近韓國公司SGC就宣布要拍大尺度真人騷節目《GODIVA SHOW》，邀請7男7女前往濟州島同居生活100日，用上60部攝影機無間斷24小時直播，強調冇劇本零剪接！

14名參賽者將會與世隔絕100日，冇得用電話、電視及電腦，參與節目組所安排嘅一系列任務，盡情喺鏡頭下展現個人魅力，經過多輪淘汰及人氣票選，勝出者將會獲得1億韓元獎金（約65.9萬港幣）。

官方表示為求真實，節目完全冇劇本、冇導演、零剪接，總共用上60部攝影機24小時拍攝，並上傳到YouTube及電視直播。另外製作組更話已徵得參賽者同意，就連沖涼房都會安裝攝影機，不過我諗就唔會真係見到裸體嘅。

從日前官方公開嘅預告片，可以見到多位身材火辣嘅參賽者集結喺泳池到玩波波，隔住個Mon都感受各位嘅血氣方剛。節目將於11月1日起率先喺YouTube直播；11月底於Amazon Prime播出15集經剪輯嘅版本。